作者：林筱瑾

沪语改写：冯济民

诵读：洪瑛

文字修正、推荐：丁迪蒙

编辑：王乙其

宝石花，小巧玲珑又容易活，特别适合小盆栽种，是石库门时代个上海人家欢喜个阳台植物。伊个花名通俗，比起伊个学名“石莲”“胧月”更加贴切。宝石花是我小辰光个识花开篇，也滋养出我从小对园艺个向往。

记得住勒里弄里个辰光，特别眼热邻舍三层楼阳台浪荡下来个宝石花，足足有尺把长，像一捧花球。肥厚个花瓣层叠勒海，遮牢了阳台个栏板，历经风吹雨淋，陪伴老主人。灰绿色个花像是固化个辰光，凝成雕塑搭建筑融为了一体，泛出了质朴个美感。

终于有一日，我小心翼翼个讨得来几片宝石花叶子，摆勒花盆里，倒一眼淘米水，三四天之后，就看到叶片个基部突起来米粒一样个嫩叶，随后一粒、两粒长成菱形个小嫩叶。肥厚个母体慢慢叫干瘪，直到叶底长出纤细个白色根须，小小个宝石花就可以勿靠母体，直接用根须吸收泥土里个养分了。迭个辰光，母体慢慢叫萎缩，直到消失勒土里向。

宝石花个生长对土质要求勿高，伊是多肉类植物当中顶好养个。要养好伊，精髓勒勒“偷懒”两字——勿好巴结个浇水，湿度过高根会得烂脱。伊满足于日晒雨淋纯自然个状态，否则就光长身体勿长叶子，发育成为又瘦又高个绿豆芽体型了。发育成熟个宝石花每年会得开黄颜色个小花，勿起眼，但毕竟是“宝石”开花，足够让爱花人士陶醉了。

有趟暑假，一家门外出旅游，一眼盆盆罐罐培植个花草摆勒晒台浪呒没人照看，回来之后，其他植物侪死脱了，唯独宝石花坚强个活勒海。

长大之后，住勒高楼大厦个小区，有得天落水个阳台难觅，忙碌个工作也让我搭花草暂时告别了。后来流行“多肉”植物，品种多到眼花六花，我忍不牢心动买回来，但因为掌握不牢伊拉个脾性而以失败告终。从此对“多肉”呒么啥感觉，独留勒心底里向个，仍旧是伊个“宝石”花。

退休之后，终于可以好好叫发展自家个园艺爱好了，市面浪花鸟市场已经稀缺，还好，勒“淘宝”时代，宝石花迭能娇弱个植物也可以网购。按照记忆当中个样子，我勒电脑浪打进去“胧月多肉”几个字，比较之后，觅得6年精养悬崖式老桩数枝，再买得来粗制个陶瓶，摆出造型，悬垂个玉叶虽然勿及弄堂阳台浪个壮实，但也算得到其中个精髓，有“以少胜多”之美。

齐巧，今年老同事个顶楼老宅改造，想让我参谋装修事宜。跑到阳台，竟然发现一丛芦荟搭宝石花掼勒角落里。原来是同事个丈人老头老早种勒海个，老人去世半年了，就让伊野蛮生长至今，迭趟新装修，当然是要掼脱个。搿场机缘巧合让我成为了伊拉个新主人。现在，迭盆宝石花陪伴勒悬垂个老桩，一高一矮相映成趣。

清晨，为绿植浇水个辰光，我个目光总归会得拨“宝石”牵引。勿晓得哪能个，搿份美比窗外头个玉兰、红枫、桂花更加有韵味。但愿时光流转，伊拉慢慢叫接近梦想当中圆满个样子。

诵读者：洪瑛

——————————————————

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年儿童出版社

《实用沪语》复旦大学出版社

《上海话绕口令》少年儿童出版社

《上海方言词语使用手册》上海教育出版社

《上海话读成语故事》少年儿童出版社

《囡囡学童谣》，少年儿童出版社

《囡囡学成语》，少年儿童出版社